mercoledì 18 marzo 2020

Fra' Domenico Spatola: Preghiera a San Giuseppe

O patri di li puvireddi,
quanti sunnu i ciriveddi
ca sì chiamatu a cunsulari
'nta stu tempu di carnalivari?
No! Nun è festa spensierata,
è tragedia annunciata.
Tutti sunnu in mascherina
pi taliarisi 'a carina
da stu mali granni e avversu
ca nn'arrunza tempu persu:
nun putemu caminari
e, scantati, rintra am'a stari.
Cu purtò stu focu granni?
Io ancora in tanti anni
nun l'avia canusciutu:
eru orbu oppuru mutu?
Ora inveci rapu l'occhi
e paremu tanti luocchi.
Chi succeri amatu Santu:
a to festa era un gran vantu,
pasta ch'i sardi e beddi sfinci
ca quannu i viri ti ci impinci,
ma st'annu è tuttu sutta tonu:
c'è silenziu e manca u tronu,
picchì stu virus ni fa fissa
puru si ti ricemu a Missa.
San Giuseppi, fai qualcosa,
pi to Figghiu e pa to Sposa,
fanni presto riturnari,
vulemu tutti travagghiari,
e perciò si ti fai surdu,
chistu a nui nni pari assurdu.
Fanni a grazia, gran Patruni:
passi presto stu cicluni.

Fra' Domenico Spatola

1 commento: